من خراريف زمان ( البيانكي السوداء ) من الجزء الأول إلي الثامن / محمد أبوبكر بالأشهر .. ليبيا

15056291_1117084015076415_8869242878301944503_n.jpg

من خراريف زمان :
البيانكي السوداء: ( الجزء الأول )
في سنة 1968م اشتر لي أبي دراجة (بشكليط) نوع بيانكي إيطالية سوداء اللون من بائع الدرجات بسوق الجمعة كان اسمه عبد الواحد ،كان ثمنها واحد وعشرين جنيه ونصف،تدفع خمسة جنيه ونصف مقدما، والباقي بالدفعة في الشهر زوز جنيه،بضمان كمبيالة على بياض،ويحررعقد الشراء (الريشفوطة) وتأخذ الأصل منها تحفظها في حقيبة (شنطة)جلدية مدلاة على مقودها (الدومان) تقدمها للبوليس لما يشدك دليل على ملكيتك للبشكليط ،مش خانبها ،واذكر مرة شدني بوليس اسمه عبد ربه راكب على حصان ،قاللي تعالى وين الريشفوطة؟ وقفت وفتحت الشنطة وعطيتها قاللي هكي كويس بس تخلص في الراجل كل شهر والا لا ؟ قلتله نعم قاللي نمشيله ونسأله لو كان متخلصش فيه نحبسك ونفك منك البشكليط، يا ولد، ( هو شن دخله نخلص والا منخلصش ،زعم الأمانة هكي تقول،والا الدكتورية)؟ ومع أنا صادق معاه نرعش زي الجريدة، عارفين علاش نرعش لأن البوليس كانت ليه هبة من بعيد نهربوا منه،( هذا علاش الأمن مستاتب) وبعد أربع سنين البوليس وللي شرطي ونقصت هبته،وضاع نصف الأمن)، وبعد أربعين عام رجع الشرطي بوليس بالملابس وبلا هيبة ،زمان نخافوا منه واليوم يخاف منا باسم الحرية دير ما تبي،زمان يحاسبك على ورقة تفيذ ملكيت بشكليط ،واليوم يشبح بعيونه سيارة مخنوبة وبلا طارقات ومعتمة ،وما يقدرش يقول الناقة، عند حق يخاف على صغاره وعلى حياته لأنه يعرف حاميها حراميها، لا حول ولا قوة إلا بالله،وين مشيت أنا ،يا صغار شن رقدتوا،هيا غذوة نكملوا حكاية البشكليط ،حتى الضي هرب ما فيش خير من النوم ما دام كلهم راقدين تصبحوا على خير..

من خراريف زمان :
البيانكي السوداء: ( الجزء الثاني )
كنت فرحان ببشكليطي كنت ندور بيها في شارعنا ونكووش غروووور لأن هذا أقصى ما يتمناه الشاب منألعاب، بوي قاللي شمر على درعانك وخلص حق البشكليط، قاللي خالي تعالى يا ولد أختي نعطيك شوي بضاعة بيعها وتربح فيها وخلصني بالدفعة، ومن يومها خشيت سوق التجارة درت برتبقاج خلفي وأمامي على البشكليط وبعت الأحدية وبعت الليموني (طناجر وصواني وصفر)والمرش(طواسي ومالقيات)ورتقا بي الحال وتبحبحة بديت نبيع في الحرير(رديوات وتساتميل)يا سلام على أمي وهي لابسه التسمال وجداي وهي لابسه العصابة، عيطوا الصغار وقالوا شن يا جدي قلت جداك في العصابة،لا لا العصابة بفتح العين مش بكسرها وأنت كسرت كل شيء حتى الحروف زمان مافيش عصابة (متع الخنبة) زمانفيه عصبة باش مدخلونيش في بحر مش لي خلى نحط البشكليط ونفهمكم العصبة، يا ولادي العصبة زوز وحدة تجي من جهة النسب ويسموها العصبة النسبية وهي ثلاثة أقسام بالنفس وهي كل ذكر لايدخل في نسبه إلى الميت أنثى،والعصبة بالغيروهي كل أنثى من ذوات الفروض إذا اجتمعت مع أخيها،والعصبة مع الغير زي الأخت الشقيقة مع البنت ،هيا فكونا من علم الميراث وهذا كلام واعر وصاعب عليكم توا ،وبعدين قولوا يا جدي توا معادش يعطوا في حق خواتهم في الميراث لين تبي العصبة يأخذوا ،أحسن حاجة توا يا جدي تكون في عصابة ومعاك كلاشن ولله حتى مسدس وتحصل الخير والبركة ،شن تقولوا يا صغار بركة شنو تأخذ أموال الناس بالغصب هذا حرام هذه عركة مش بركة ،بالله عليك يا جدي أسكت هم المشائخ يخذوا في الحرام ،كيف؟ قالوا ياجدي ينافقوا باش يوصلوا يخي فيه لي يقبض بالدولار ومش هكي وبس، كيف يا جدي واحد متخصص في الزراعة واحد طبيب سنون توا مشايخ وهم لي ماسكين لو مش بزنس يخشوها وهذا مش حرام ،يا صغار أرقدوا طوال الليل والليل بي وديناته والنهار بعويناته وغذوة نكملوا الخرافة ..

من خراريف زمان :
البيانكي السوداء: ( الجزء الثالث )
كنت فرحان ببشكليطي كنت ندور بيها في شارعنا ونكووش غروووور لأن هذا أقصى ما يتمناه الشاب منألعاب، بوي قاللي شمر على درعانك وخلص حق البشكليط، قاللي خالي تعالى يا ولد أختي نعطيك شوي بضاعة بيعها وتربح فيها وخلصني بالدفعة، ومن يومها خشيت سوق التجارة درت برتبقاج خلفي وأمامي على البشكليط وبعت الأحدية وبعت الليموني (طناجر وصواني وصفر)والمرش(طواسي ومالقيات)ورتقا بي الحال وتبحبحة بديت نبيع في الحرير(رديوات وتساتميل)يا سلام على أمي وهي لابسه التسمال وجداي وهي لابسه العصابة، عيطوا الصغار وقالوا شن يا جدي قلت جداك في العصابة،لا لا العصابة بفتح العين مش بكسرها وأنت كسرت كل شيء حتى الحروف زمان مافيش عصابة (متع الخنبة) زمانفيه عصبة باش مدخلونيش في بحر مش لي خلى نحط البشكليط ونفهمكم العصبة، يا ولادي العصبة زوز وحدة تجي من جهة النسب ويسموها العصبة النسبية وهي ثلاثة أقسام بالنفس وهي كل ذكر لايدخل في نسبه إلى الميت أنثى،والعصبة بالغيروهي كل أنثى من ذوات الفروض إذا اجتمعت مع أخيها،والعصبة مع الغير زي الأخت الشقيقة مع البنت ،هيا فكونا من علم الميراث وهذا كلام واعر وصاعب عليكم توا ،وبعدين قولوا يا جدي توا معادش يعطوا في حق خواتهم في الميراث لين تبي العصبة يأخذوا ،أحسن حاجة توا يا جدي تكون في عصابة ومعاك كلاشن ولله حتى مسدس وتحصل الخير والبركة ،شن تقولوا يا صغار بركة شنو تأخذ أموال الناس بالغصب هذا حرام هذه عركة مش بركة ،بالله عليك يا جدي أسكت هم المشائخ يخذوا في الحرام ،كيف؟ قالوا ياجدي ينافقوا باش يوصلوا يخي فيه لي يقبض بالدولار ومش هكي وبس، كيف يا جدي واحد متخصص في الزراعة واحد طبيب سنون توا مشايخ وهم لي ماسكين لو مش بزنس يخشوها وهذا مش حرام ،يا صغار أرقدوا طوال الليل والليل بي وديناته والنهار بعويناته وغذوة نكملوا الخرافة ..

من خراريف زمان :
البيانكي السوداء : ( الجزء الرابع )
توا نبي نحكيلكم، الحكايات اللي فاتت كلها ربطنها بالبشكليط البيانكي، في عام 1972م شريت كرهبة (سيارة) نوع داتسون 1200 لونها صفرة فاتحة، تعرفوا بقداش 905دينار بالكمبيالة، دفعت 455دينار والباقي بالتقسيط، (ثمن برافانقو –الرفراف اليوم) يا جدي زمان السيارات رخاص، ومع هذا يسعدوا فيكم بالتقسيط؟ إيه لكن تعرفوا أنا خشيت نخدم في مصرف الأمة راتبي كان 69دينار ،ونازلة فيهم البركة ،وين خشوا المخانب والربا ،شريت داتسون 2000دينار ،وكل ما يمر عام يزيد سعر السيارات،زمان كان عندنا ديار يبيعوا في السيارات دار المازدا ودار المرسيدس ودار التيوتا والزفاقن، هذة تمشي بلا مياه، ولا بد تشوف وقت الاستلام كل شي في السيارة حتى شنطة المفاتيح ،اليوم تأخذها تلقى هلبا حاجات مخنوبة الراديو والولاعة ومرات حتى الشكورطة مهناش،ويا سيد ماشي الحال،وزمان تسوق بلا رخصة يفتحلك ربي ممنوع ،والرخصة فيها امتحان،والامتحان واعر متحصلهاش الرخصة لين تدرب كويس وتسوق كويس وتعرف إشارات المرور، وكل سنتين ادير الكلاودي (الفحص الفني) للسيارة ،وهم لي يقولوا السيارة باهية وإلا لا،وتدفع التأمين،شن تحسابوه لعب كان واعر،لكن اليوم الحمد لله باسم الحرية كلها تسوق في السيارات حتى لي عمره عشر سنوات ،مش هكي وبس، بوه فرحان بيه أهو يجيب الخبزة ويرفع أمه واخواته للمدرسة ،يخي أمه تزغرد عليه لما يشلش بيها، ولو ضرب واحد ،يجي بوه، ويقول قضاء وقدر والله غالب ، هذا ما يدريش على حاله بأنه مجرم مفسد لأولاده ورزقه والحق الضرر بالآخرين،يقولك بر اشكي كأنه عايش في غابة،مش هكي وبس مرات سيارته بدون لوحات ومعتمة ،عادي يا جدي ،باهى عادي لين فات غادي ،توا ارقدوا وغذوة بحكيلكم ،مرة واحد ضربني بسيارته وهرب،كمل يا جدي لا ارقدوا مادام الضي مهربش باش كل واحد يعرف فراشه،هيا تصبحوا على خير..

من خراريف زمان:
البيانكي السوداء : ( الجزء الخامس )
تفكرت يا صغار كلامكم لما قلتم عادي سيارات تمشي في الشارع بلا لوحات، صح أمر هين قدام دبابة تمشي في الشارع وين نشوف الدبابات نحساب الخريطة انقلبت وصرنا على حدود إسرائيل، طلع دماغي هو المقلوب زمان كانوا الامريكان في الملاحة (قاعدة معيتيقة توا) وكانت حراسات مشددة عليها ما فيه حد يقرب منها ومع خوفهم لم نرى دبابة في الشارع، (يا جدي الدبابات توا تضرب في صلاح الدين) لا يا صغار صلاح الدين رحمة الله عليه كان بطلا شجاعا وفي زمانه كان السيف مش كلاشن كوف وقال نتحشم أن يراني الله ضاحكا واليهود في فلسطين وحرر بيت المقدس ( يا جدي مش صلاح الدين لي تحكي عليه صلاح الدين منطقة بعد الهضبة الخضراء) وينها الهضبة الخضراء لا خضراء ولا صفراء توا حمرةمن النار والدم.
وتسمع إلا في التبرزيم القنابل حتى الموتى ما هم في راحة قالوا قنبلة طاحت في مقبرة السدرة
يا حسرة سدرة تعطي النبق واليوم تتلقى رصاص البنادق والله يا صغار يسلة ودرهت الكبد منهالعصابات لي ما تخاف ربي بالله نوضوا أرقدوا رأني مغشش على لي يصير في بلادنا أرقدوا زي ما راقدين الكبار حتى يجيكم الخير الموعود مع الوقت الموعود تصبحوا على خير..

من خراريف زمان:
البيانكي السوداء : ( الجزء السادس )
الليلة نبوا نهدرزوا على التلفزيون، لكن خلى نفهموا الحكم الشرعي في مشاهدة التلفزيون، مرة وأنا في السعودية، واحد قاللي: التلفزيون حرام، وأنا شاري شريط فيديو للشيخ السديس، قولتله: أنا عارف التلفزيون حرام، والشريط نبي نحطه في طنجرة ونتفرج عليه في الصفرة متع الرشدة، قاللي شن تقول؟ قولتله أخطاني وخليني في حالي،خيرك تراقب في الناس شن ما سمعتش بالحديث اللي يقول :من راقب الناس مات هما، قاللي هذا من باب النصيحة، قولتله: النصيحة من الدين ولا بد الناصح يكون أمين وعالم بما ينصح، باهي قوللي كان التلفزيون حرام علاش علماء الحرم راضين بالكميرات في الحرم، علاش يديروا قناة خاصة بالعلامة محمد صالح العثيمين،علاش ينقلوا خطبة عرفة والمفتى هو اللي يخطب، وعلاش مديرين برنامج يستفتونك،اتصل بيهم وأسألهم،سكت وقاللي شن دخلي فيهم لكن التلفزيون حرام ،عرفت روحي ناقش في جاهل،فقلتله،قال الله تعالى: وَإِذَا خَاطَبَهُمُ الْجَاهِلُونَ قَالُوا سَلَاماً }الفرقان63 ومشيت،المهم التلفزيون سلاح ذو حدين ،وأنت اللي تتحكم فيه،إذا كنت خائفا من الله ،وتشاهد البرامج الثقافية والدينية والعلمية فلا حرج ولا باس وهو مباح،وإذا كان دماغك خامر معبي بالشبهات والشهوات، هذا حالك مش حال كل الناس، دورلك على طبيب يدويك،قصدي دورلك على شيخ يعلمك أصول الدين،تقريبا عرفتم يا احفادي حكم التلفزيون ،زي السكين سلاح ذو حدين،وبعدين أنا نبي نتفرج وحسبي هو الله،على فكرة علاش الناس يديروا في هاتف ويسألوا علماء السعودية؟،واحد قال:العلم عندهم بس،وبلادنا مافيهاش علماء،والدين جي من غادي،هذا قول متعصب،قولتله:اسمع بلادنا معبية بالمشائخ لكن أنتم متعرفوش قدرهم،ولا تعرفوهم،ولا تعرف حتى مشائخ السعودية،ولا تعرف فقه الواقع، ولا فقه الأولويات،ولا اختلاف الاماكن ولا الأحوال والأشخاص، وبالتالي ليس لي معك كلام،يا أحفادي قولوا هذا الكلام لأي واحد مصكر متعصب وردوا بالكم تحادوه، راهو زي الجمل الاجرب يدعيكم بمرضه،هذا النوع يبي طليه بالقطران باش يشفى من مرضه،توا اسمعوا منى الفقه ليه رجال ،وكل علم ليه رجال،كملوا عمارهم في طلب العلم،مش واحد قري ورقتين صار عالم، خلى نكمللكم خرافتي،راهو كبدي دارهة من هاللي جونا في أخر الوقت.يا جدي الضي هرب، هو أنا اللي نبي نهرب منكم كان هذا حالكم ،نوض ارقد انت وإياه ،هيا تصبحوا على خير..

من خراريف زمان:
البيانكي السوداء : ( الجزء السابع )
قبل التلفزيون كنت واحد من لي حبوا الراديو، شريته كان فيه سبتة طويلة ومعلقه في رقبتي، نسمع في برنامج قول على قول للمرحوم حسن الكرمي، كان يذيعه من القسم العربي في هيئة الاذاعة البريطانية في لندن، (المذيع يقول هنا لندن، نحسابه حق طرابلس هي لندن هذا الكلام في بداية السبعينات وتوا في بداية القرن الحادي والعشرين عرفت طرابلس هي لندن لما جاها زرق عيون دَيفيد وليام دونالد كاميرون رئيس وزراء المملكة المتحدة واستقبله سعادة المستشار في يوم التحرير (جدي تحرير شنو) مش عارف خيرني لخبطت يوم التحرير من الطاغية أو التاغية) يا صغار ذهبتوا شيرتي خلوني مع حسن الكرمي وبرنامجه، كان عبارة عن سؤال وجواب، وبعدين جمع وقامت دار لبنان للطباعة والنشر بنشره في 11 المجلد، وكان أول سائل من ليبيا هو عبد السلام غانم من طرابلس، وكان سؤاله من القائل وفي أية مناسبة:
أعِد نظرا يا عبد قيس، فإنما ***أضات لك النار الحمار المقيدا.
وكان الجواب البيت للفرزدق وليه قصة، اسمعوا يا صغار فكوا رواحكم من التلفزيون والكتاب هوينه في المكتبة افتحوا صفحة 66 في الجزء الأول تلقوا القصة كاملة.
وكنت نحب برنامج عبد العزيز العروي في إذاعة تونس باللهجة الدارجة وكان زيه محمد حقيق حتى هو باللهجة الدارجة كانت قصص وحكم فيها عبرة ،حتى الغناء كان حكم مش توا كلام فارغ لا ذوق ولا فن ولا حترام ،لا يا جدي غناء زمان واعر قالوا كلام شعراء الجاهلية ،وتوا ساهل تحفظه بسرعة ،زي غناية بنحبك يا حمار ،علمنا أولادنا قلة الآدب يعاود فيها لي بوه وجده وتلقاه يضحك معاها ،هيا يا صغار مرة ثانية نحكيلكم خرافة من خراريف العروي،لكن فيه ناس ما يعجبها العجب ولا الصيام في رجب ،فالحين إلا في الضرب على الركاب (نقذ هدام) من باب الحسد فمرة عبد العزيز العروي هو يحكي قال:بعثلي واحد رسالة وقال فيها توا أنت راجل كبير مش خيرلك تقعمز في الجامع وتسبح أفضل من هالخراف الزايد شوي رد عليه وقال له يا ولدي (شوفوا الأدب ) برنامج متاعي عشر دقائق وبيني وبينك بطمة.(معناها وين يجي برنامج متاعي صكر عليا وإلا حول الموجة،يا ريت لي يقروا توا كان ما يعرفوش يعلقوا يصكروا والا ما يطلعش أصلا،مرات أنت تبدل جهد وتكتب من باب الفائدة تعم الجميع،اطيح في واحد لا منطق ولا أخلاق يرد عليك رد يركبك السكر والضغط، تقول أنا معادش نكتب حرف،لكن الكتابة حشيشة حرفة،ثاني يوم تلقى روحك تكتب بدون ما تدري ،وتقول في نفسك (طز طز طز فيهم) جدي شن طز هذه؟ والله زمان نقولوا فيها على الامريكان نقولوا طز في أمريكا، لين ورتنا الطز في 86 وورتنا الطز في كل شيء، تباهي يا جدي شن هو الطز؟ قالوا الطز هو الملح بالتركي، وتوا فيه هلبا طز تركي، وقطري اماراتي ولكن أحسن طز (ملح) هو الليبي مع الاحترام للقاريء إلى اللقاء ..

من خراريف زمان:
البيانكي السوداء : ( الجزء الثامن )
الليلة خرافة جديدة قصة باي باي، يا جدي نبوها ، باهي اسمعوا وحلوا وذانكم باي باي هذة تحية الروامى،(الأجانب الكفار) حنا مسلمين،تحيتنا في القرآن قال تعالى:( وَإِذَا حُيِّيْتُم بِتَحِيَّةٍ فَحَيُّواْ بِأَحْسَنَ مِنْهَا أَوْ رُدُّوهَا إِنَّ اللّهَ كَانَ عَلَى كُلِّ شَيْءٍ حَسِيباً }النساء86 معناها ربي يبي يحاسبنا حتى على التحية ،وقال تعالى:( فَإِذَا دَخَلْتُم بُيُوتاً فَسَلِّمُوا عَلَى أَنفُسِكُمْ تَحِيَّةً مِّنْ عِندِ اللَّهِ مُبَارَكَةً طَيِّبَةً كَذَلِكَ يُبَيِّنُ اللَّهُ لَكُمُ الْآيَاتِ لَعَلَّكُمْ تَعْقِلُون }النور61 معناها لي يخش في حياش الناس بالقوة وميسلمش ويخش بدون أذن ،هذا جاهل وغير عاقل ،ربي قال في نهاية الآية لَعَلَّكُمْ تَعْقِلُون ،وقال تعالى على أهل الجنة :(أُوْلَئِكَ يُجْزَوْنَ الْغُرْفَةَ بِمَا صَبَرُوا وَيُلَقَّوْنَ فِيهَا تَحِيَّةً وَسَلَاماً }الفرقان75 قولوا اللهم اجعلنا منهم،ريتوا تحيتنا فيها السلام مقرون بالرحمة ومشفوع بالبركة، يا جدي لا عاد فيه سلام ولا رحمة ولا بركة ،لا لا أنتم تقدروا تردوا هذة الأخلاق الطيبة وتنشروا الرحمة والبركة والسلام ،لو ما فيش هذة ما فيش إيمان عن أبي هريرة قال قال رسول الله صلى الله عليه وسلم لا تدخلون الجنة حتى تؤمنوا ولا تؤمنوا حتى تحابوا أولا أدلكم على شيء إذا فعلتموه تحاببتم أفشوا السلام بينكم.رواه مسلم.يا جدي بالك الحديث ضعيف؟ كان قعد هذا الحال يقولوا عليه ضعيف والحمد لله لي ما قالوا مفيش بكل، قالوا ضعيف والضعيف يؤخذ به في فضائل الأعمال، الحديث صحيح لأهل الإيمان، في هذا الوقت قنابل وبارود حتى أعرسنا بالمفرقعات لا يعرفوا مريض ولا يعرفوا حرمة الجار وقالك بلد الزهر والحنة هيا ياسر الليلة خير ما تقولوا جدي صاحب بدعة، وتحكوا بيه للجماعة، يقولولكم جدك هذا كافر، يحتاج إلى حزام ناسف، ومنها معاد تقعمزوا معاي، لا يا جدي اللي على بالك حنا مانسمعوش فيهم، هيا ربي يستركم ويسترنا، ويعطيكم الوقت الطيب تصبحوا على خير..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s